Hermann zum 70. Geburtstag

I Läserbriefe tuet sich d Wuet entlade:
Ned z gseh! ned z ghööre! Und für d Seel e Schade.
Sit die Frau Mundel im Theater wüetet,
lauft s Publikum devo und d Kasse blüetet.
Im Parterre isch ein einzige no gsässe:
De Hermann, wo sis Hörgrät het vergässe.

 

S Beatrice schafft z Südafrika vor Johre,
für Schindler Schwyz allei – das het si gschwore.
Im letschte Johr sind s Bendels wieder dunde,
nur als Tourischte, händ sie beidi gfunde.
Die wohr Mission chan ich euch nümme brichte:
De Regli het die Akte lo vernichte.

 

De Hermann tuet für neuschti Technik schwärme,
Computer, Autos und es Bett zum wärme.
Im KKL tuet beschtens är au hinde
die futuristischi Akustik finde.
Deet gniesst är mächtig s Klinge vom Orchester,
doch nume, wenn es Musig spielt vo geschter.

 

Zäck pumm, scho isch si broche gsy die Hand.
Zäck pumm, au d Schultere isch abenand.
Spital und Ärzt, Verbänd – är liidet Quale,
und muess no z letscht e gsalzni Rächnik zahle.
D Kopii devo, die wird noch Bärn spediert –
Vor Schreck het d Dreyfuss grad demissioniert.

 

"Verdammt, wo isch de Schlüsselbund scho wieder!
Beatrice, hilf mer sueche!" Äis Gezeter.
Bis jetze häm-mer alls, wo isch verschwunde,
deheime uf Drülinde wieder gfunde.
Viellicht würd au de Georgeli Bush dört hinde
im Saddam sini Biowaffe finde.

 

Für d Ferie fahrt de Hermann in Ticino,
zum golfe, läse und es Gläsli Vino.
Die Feriekolonie tuet ständig wachse,
sit au die beide Enkel sind uf Achse.
Wenn sich d Familie wyter tuet vermehre,
denn bruuchts am Gotthard ächt e zwöiti Röhre.

 

D Lozärner tüend d Regierig reduziere.
Das wott me au im Bundesrat probiere.
De Hermann chönnt in Bärn grad drü versänke,
het är vom Villiger doch s klare Dänke,
im Couchepin sine Charme und au Figur,
jetz fählt ihm no vor Calmy-Rey d Frisur.

 

In Dütschland tüend die Rote no (!) regiere,
die Schwarze, die tüend chreftig opponiere.
In Öschterrich tuet Schwarz scho lang studiere,
wie sie die Rote chönnted integriere.
Die sölled doch dis Brigde-System probiere:
Du weisch, wie me schwarz-rot muess kombiniere!